Erläbit üsi Chäsi

I üsere Chäsi finge regumässig Aläss statt.

Füürwagechäset

D‘Füürwagechäset isch äs einzigartigs Erläbnis und fingt immer am erste Mittwuch im Monet in üsem Lade statt.

Dir chöit d’Chäshärstellig erläbe wie me’s Afangs vom 20te Jahrhundert no gmacht het. S‘grosse Chessi im Lade wird dür nes Holzfüür ufgheizt. Das Füür wird im Füürwage wo dürne Schacht vo dusse ihgfüüret wird unger s’Chessi zoge. Chömit doch verbi und luegit bim Füürwagechäse zue.

Die nächste Füürwagechäsete si:

4. Oktober ab 13:30 Uhr
1. November ab 13:30 Uhr

Säuber ä Chäs mache

Heit dir scho immer einisch wöue säuber ä Chäs mache? Bi üs wärdit dir vo üsne Chäser begleitet und instruiert wie me chäset. Aus Familie, mit Fründe oder Arbeitskollege machit dir us 60 Kilo Miuch ä ca. füifähaub Kilo schwäre Chäs. Dä Chäs düe mir när für öich im Chäschäuer öppe 3 Monet riife. We de Chäs riif isch chöit dir dä cho abhole und gniesse. Es Erläbnis vo öich no lang i gueter Erinnerig wird blibe!

2 bis 20 Persone/Alass, inkl. aui Zuetate und Ungerstützig vo üsne Chäser: pauschal CHF 300.00.

Nach äm Alass bereite mir für öich gärn äs Apéro zue mit äre Uswau us üsem Chässortiment und, wenn gwünscht, Trochefleisch vo Jumi’s derzue. Für nes Apéro chöi mir max. 30 Persone bewirtschafte. Gärn stöue mir öich ä Offerte zäme.

Füehrig dür d‘Chäsi

Was äs aues brucht zum us gueter Miuch ä feine Weichchäs oder ä Hertchäs z’mache, chöit dir bire Füehrig dür üsi Chäsi erfahre und erläbe.

Üsi Chüe wärdit dir zwar nid aträffe, aber derfür lerit dir «s‘Rosalie» und «d‘Süsette» kenne. Die zwöi häufe üsne Chäserinne und Chäser bir tägleche Pfleg vo de Chäs.

Ä Füehrig duret mind. 45 Minute und chostet CHF 80.00/Gruppe, max. 20 Personen.

Nach äm Alass bereite mir für öich gärn äs Apéro zue mit äre Uswau us üsem Chässortiment und, wenn gwünscht, Trochefleisch vo Jumi’s derzue. Für nes Apéro chöi mir max. 30 Persone bewirtschafte. Gärn stöue mir öich ä Offerte zäme.